Mediprotekto

Mediprotektado aŭ mediprotekto estas tia intenca, organizita socia agado, kies celo estas la evito, malpliigo, elimino de la damaĝaj sekvoj de la homa agado en la industrio, agrikulturo, minado. La mediprotektado celas rezervi la naturan medion por la sekvaj generacioj.

La mediprotektado estas homcentra nocio: ĝi fokusas ĉefe pri la senviva medio de la homo (akvo, aero, konstruaĵoj) tiel ĝi ne estas sinonimo al naturprotekto. Al la mediprotektado apartenas batalo kontraŭ la (trafika kaj alia) bruo, medipoluado, akvopoluado, malpliiĝo de agrosurfaco, tutmonda varmiĝo ktp.

Tiu okupo estas pri la interagado inter homo kaj lia natura ĉirkaŭaĵo aŭ tiu kreita de li. La sciencistoj, kiuj donas informojn aŭ solvojn en ĉi tiu kampo, nomiĝas mediaj sciencistoj, kaj inter iliaj fakoj estas: ekologio, atmosferaj sciencoj, teraj sciencoj, kemia inĝenierado, akva inĝenierado. La kampo ankaŭ estas fekunda platformo por politikaj kaj sociaj ideologioj, kiuj postulas pli grandan konsideron pri mediaj konsideroj en la kunteksto de ekonomia disvolviĝo.